Хотын даргыг иргэд өөрсдөө шууд сонгодог байх нь ардчиллын зарчимд илүү нийцнэ гэж үзэж байна. Нийслэл хот нь улсын хамгийн их хүн ам буюу 1,6 сая хүн амьдардаг, хамгийн том төсөв, хамгийн олон бүтээн байгуулалт төвлөрсөн онцгой нэгж учраас хотын удирдлагыг сонгох асуудал иргэдийн шууд оролцоотой байх шаардлагатай.Иргэдийн оролцоо бол хяналт юм. Хотын дарга нь зөвхөн улс төрийн томилгоогоор бус, иргэдийн итгэл хүлээсэн, мэдлэг боловсрол, мэргэжлийн чадвар, хотын хөгжлийн талаар бодит алсын хараатай, нийтийн эрх ашгийг нэгдүгээрт тавьдаг хүн байх ёстой. Иргэд өөрсдөө сонголтоо хийх боломжтой болсноор намын эрх ашигт илүү үйлчлэх бус, сонгогчдын өмнө хариуцлага хүлээдэг тогтолцоо бүрдэх ач холбогдолтой. Мөн хотын төсөв, газрын бодлого, дэд бүтэц, нийтийн үйлчилгээ зэрэг асуудал нь иргэн бүрийн амьдралд шууд нөлөөлдөг тул эдгээр шийдвэрийг хэрэгжүүлэх удирдлагыг иргэд өөрсдөө сонгох эрхтэй байх нь зүйтэй гэж үзэж байна. Иймээс хотын даргыг иргэдээс шууд сонгодог тогтолцоог бий болгох нь хариуцлагатай, ил тод, иргэдэд үйлчилдэг засаглалыг төлөвшүүлэхэд чухал алхам болно.